ಬೆಂಗಳೂರು: ಕುಡಿದ ಮತ್ತಿನಲ್ಲಿ ಸ್ನೇಹಿತರ ನಡುವೆ ಗಲಾಟೆ ನಡೆದಿದ್ದು, ಯೋಗೇಂದ್ರ ಸಿಂಗ್ (25) ಎಂಬಾತನ ಕುತ್ತಿಗೆಗೆ ಬಾಟಲಿಯಿಂದ ಚುಚ್ಚಿ ಕೊಲೆ ಮಾಡಿರುವ ಘಟನೆ ಭಾನುವಾರ ತಡರಾತ್ರಿ ಹೊಸ ಗುಡ್ಡದಹಳ್ಳಿಯ ಕಲಾ ವೈನ್ಸ್ ಸ್ಟೋರ್ಸ್ ಬಳಿ ನಡೆದಿದ್ದು, ಆರೋಪಿ ಉಮೇಶ್ ಎಂಬವನನ್ನು ಬ್ಯಾಟರಾಯನಪುರ ಠಾಣೆ ಪೊಲೀಸರು ವಶಕ್ಕೆ ಪಡೆದಿದ್ದಾರೆ ಎನ್ನಲಾಗಿದೆ.
ಯೋಗೇಂದ್ರ ಸಿಂಗ್ ಎಂಬುವವನು ನರಸಾಪುರ ಇಂಡಸ್ಟ್ರಿಯಲ್ ಏರಿಯಾದ ಕಂಪನಿಯೊಂದರಲ್ಲಿ ಮಿನಿ ಬಸ್ ಚಾಲಕನಾಗಿದ್ದ, ದಸರಾ ರಜೆಗೆ ಕಸ್ತೂರಬಾ ನಗರದಲ್ಲಿರುವ ತನ್ನ ಮನೆಗೆ ಬಂದಿದ್ದ, ಯೋಗೇಂದ್ರ ಸಿಂಗ್, ಸ್ನೇಹಿತ ಉಮೇಶ್ ಜೊತೆಗೂಡಿ ತಡರಾತ್ರಿ ಮದ್ಯಪಾನ ಮಾಡಿದ್ದು, ಇಬ್ಬರೂ ಸ್ನೇಹಿತರು ಪಾನಮತ್ತರಾಗಿದ್ದರು. ಹಳೆಯ ಜಗಳದ ವಿಚಾರವಾಗಿ ಮತ್ತೆ ಗಲಾಟೆ ಮಾಡಿಕೊಂಡಿದ್ದರು. ಅದೇ ವೇಳೆ ಆರೋಪಿ ಉಮೇಶ್ ಬಾಟಲಿಯಿಂದ ಯೋಗೇಂದ್ರ ಸಿಂಗ್‌ನ ಕುತ್ತಿಗೆ ಇರಿದಿದ್ದಾನೆ. ಪರಿಣಾಮ ಯೋಗೇಂದ್ರ ಸಿಂಗ್ ಮೃತಪಟ್ಟಿದ್ದಾನೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
ಮೃತ ಯೋಗೇಂದ್ರ ಸಿಂಗ್‌ನ ತಂದೆ ನೀಡಿದ ದೂರಿನ ಅನ್ವಯ ಬ್ಯಾಟರಾಯನಪುರ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಈ ಸಂಬಂಧ ಆರೋಪಿಯನ್ನು ವಶಕ್ಕೆ ಪಡೆದು, ಮುಂದಿನ ತನಿಖೆ ಕೈಗೊಂಡಿರುವುದಾಗಿ ತಿಳಿಸಿದ್ದಾರೆ ಎನ್ನಲಾಗಿದೆ.
Post a comment
Log in to write reviews