ನವದೆಹಲಿ: ಪ್ಯಾರಿಸ್‌ ಒಲಿಂಪಿಕ್ಸ್‌ನಲ್ಲಿ ಎರೆಡು ಕಂಚಿನ ಪದಕಗಳನ್ನು ಗೆದ್ದಿರುವ ಮನು ಭಾಕರ್‌ ಅವರ ತಂಡ ಪ್ರಮುಖ ಬ್ರ್ಯಾಂಡ್‌ ಕಂಪನಿಗಳ ವಿರುದ್ಧ ಕಾನೂನಿನ ಕ್ರಮ ಕೈಗೊಳ್ಳಲು ಮುಂದಾಗಿದ್ದಾರೆ ಎಂದು ವರದಿಯಾಗಿದೆ.

ಇದಕ್ಕೆ ಕಾರಣವೇನೆಂದರೆ ಒಲಿಂಪಿಕ್ಸ್​ ಪದಕ ಗೆದ್ದ ಬೆನ್ನಲ್ಲೇ ಕೆಲ ಕಂಪನಿಗಳು ಅವರ ಫೋಟೋ  ಮತ್ತು ವಿಡಿಯೋಗಳನ್ನು ಅಭಿನಂದನಾ ಜಾಹೀರಾತುಗಳಲ್ಲಿ ಬಳಸಿ ಪ್ರಚಾರ ಪಡೆದುಕೊಳ್ಳುತ್ತಿದೆ. ಇಂತಹ ಕಂಪೆನಿಗಳ ವಿರುದ್ಧ  ಕಾನೂನು ಕ್ರಮ ಕೈಗೊಳ್ಳಲು ಐಒಎಸ್ ಸ್ಪೋರ್ಟ್ಸ್​ ಕಂಪನಿ ನಿರ್ಧರಿಸಿದೆ

ಐಒಎಸ್ ಸ್ಪೋರ್ಟ್ಸ್ & ಇಂಟರ್​ಟೈನ್ಮೆಂಟ್ ಸಂಸ್ಥೆಯು ಮನು ಭಾಕರ್ ಅವರ ಕಾರ್ಯ ವ್ಯವಸ್ಥೆಗಳನ್ನು ನಿರ್ವಹಿಸುತ್ತಿದ್ದು, ಇದೀಗ ಕ್ರೀಡಾಪಟುವಿನ ವ್ಯಕ್ತಿತ್ವ ಹಕ್ಕುಗಳನ್ನು ಉಲ್ಲಂಘಿಸಿ ಫೋಟೋಗಳು ಅಥವಾ ವೀಡಿಯೊಗಳನ್ನು ಬಳಸಿದ ಬ್ರ್ಯಾಂಡ್‌ಗಳಿಗೆ ಕಾನೂನು ಸೂಚನೆಗಳನ್ನು ಕಳುಹಿಸಲು ಈ ಕಂಪನಿ ನಿರ್ಧರಿಸಿದೆ ಎಂದು ತಿಳಿದುಬಂದಿದೆ.

ಒಲಿಂಪಿಕ್ಸ್​ಗೂ ಮುನ್ನ ಮನು ಭಾಕರ್ ಅವರಿಗೆ ಪ್ರಾಯೋಕತ್ವ ನೀಡಿದ್ದು ಕ್ರೀಡಾ ಗೇರ್ ಮತ್ತು ಫಿಟ್‌ನೆಸ್ ಫ್ಯಾಶನ್ ಕಂಪನಿಯಾದ ಪರ್ಫಾರ್ಮ್ಯಾಕ್ಸ್ ಆಕ್ಟಿವ್‌ವೇರ್ ಮಾತ್ರ. ಆದರೆ ಈಗ ಒಲಿಂಪಿಕ್ಸ್​ನಲ್ಲಿ ಪದಕ ಗೆಲ್ಲುತ್ತಿದ್ದಂತೆ ಬಜಾಜ್ ಫುಡ್ಸ್​, ಕಾಪಿಫಿಟ್​, ಎಲ್​ಐಸಿ, FIITJEE, ಬಿಎಸ್​ಸಿ ಇಂಟೀರಿಯರ್ಸ್, ಓಕ್‌ವುಡ್ ಇಂಟರ್‌ನ್ಯಾಶನಲ್ ಸ್ಕೂಲ್, ಮತ್ತು Kineto ನಂತಹ ಬ್ರ್ಯಾಂಡ್‌ಗಳು ಫೋಟೋ ಮತ್ತು ವಿಡಿಯೋಗಳೊಂದಿಗೆ ಜಾಹೀರಾತುಗಳನ್ನು ಪ್ರಕಟಿಸಿದೆ. ಆದರೆ ಈ ಕಂಪನಿಗಳು ಮನು ಭಾಕರ್ ಅವರಿಗೆ ಈ ಹಿಂದೆ ಯಾವುದೇ ನೆರವು ನೀಡಿಲ್ಲ. ಅಲ್ಲದೆ ಯಾವುದೇ ಪ್ರಾಯೋಜಕತ್ವವನ್ನು ಘೋಷಿಸಿಲ್ಲ, ಇದಾಗ್ಯೂ ಇದೀಗ ಒಲಿಂಪಿಕ್ಸ್​ ಪದಕವನ್ನು ಮುಂದಿಟ್ಟುಕೊಂಡು ಮನು ಭಾಕರ್ ಹೆಸರಿನಲ್ಲಿ ಉಚಿತ ಮಾರ್ಕೆಟಿಂಗ್ ಮಾಡುತ್ತಿದ್ದಾರೆ. ಇದು ಕಾನೂನುಬಾಹಿರವಾಗಿದ್ದು, ಹೀಗಾಗಿ ಮನು ಭಾಕರ್ ಅವರ ತಂಡ ಪ್ರಮುಖ ಬ್ರ್ಯಾಂಡ್​ಗಳ​ ವಿರುದ್ಧ ಕಾನೂನಿನ ಕ್ರಮ ತೆಗೆದುಕೊಳ್ಳಲು ಮುಂದಾಗಿದೆ.